2024թ. նոյեմբերի 6-ին Գիտական և նորարարական գործընկերության աջակցման կենտրոնը (ԳՆԳԱԿ)՝ Եվրոպական Գիտության Զարգացման Գործակալության (APRE, Իտալիա) և ՀՀ Գիտությաունների ազգային ակադեմիայի հետ համագործակցությամբ, անցկացրեց թրեյնինգ` նվիրված ԵՄ «Հորիզոն Եվրոպա» ծրագրի հայտադիմումների նախապատրաստմանը:
Այս միջոցառումը, որը կազմակերպվել էր ԵՄ NCP_WIDERA.NET նախագծի շրջանակներում, նպատակ ուներ զարգացնել Հայաստանի գիտանորարարական կազմակերպությունների և անհատ գիտնականների կարողությունները «Հորիզոն Եվրոպա» ծրագրի հայտադիմումների նախապատրաստման գործում։
Միջոցառմանը ողջույնի խոսքերով հանդես եկան ԳՆԳԱԿ-ի նախագահ պարոն Տիգրան Արզումանյանը և NCP_WIDERA.NET նախագծի համակարգող տիկին Կատարժինա Բուշկևիչ-Սեֆերինսկան (NCBR, Լեհաստան): Տիկին Բուշկևիչ-Սեֆերինսկան ներկայացրեց NCP_WIDERA.NET նախագիծը՝ ընդգծելով հայտատուներին աջակցելու համար առկա գործիքներն ու ռեսուրսները:
Իտալիայից հրավիրված փորձագետ տիկին Ֆեդերիկա Տանգետիի (APRE) շնորհիվ մասնակիցները ձեռք բերեցին արժեքավոր գիտելիքներ հայտադիմումների նախապատրաստման գործընթացի վերաբերյալ, ինչպես նաև ստացան գործնական պատկերացումներ «Հորիզոն Եվրոպա» ծրագրի բարձրորակ նախագծի առաջարկ ներկայացնելու մասին: Նա մանրամասն ներկայացրեց հայատադիմումների կառուցվածքը՝ համապատասխանեցնելով այն գնահատման չափանիշներին և ընդգծեց մրցունակությունը բարձրացնելու հիմնական տարրերը:
Բացի այդ, մասնակիցները տեղեկացվեցին «Հորիզոն Եվրոպա» ծրագրի առաջիկա մրցույթների և դրանց մասնակցության հնարավորությունների մասին՝ պարոն Տիգրան Արզումանյանի մանրամասն զեկույցի շնորհիվ: Նա ներկայացրեց առաջիկա մրցույթները, ընդգծեց առանցքային ոլորտները, նպատակները և ռազմավարական առաջնահերթությունները, ինչպես նաև ուղղորդեց մասնակիցներին, թե ինչպես համապատասխանեցնել իրենց գիտահետազոտական նախաձեռնությունները և նախագծերը՝ առավելագույնի հասցնելու իրենց հաջողության հնարավորությունները:
Պարոն Ալեն Ամիրխանյանը՝ ՀԱՀ Յակոբեան բնապահպանական կենտրոնի տնօրենը, կիսվեց «Հորիզոն Եվրոպա» նախագծերի իրենց համակարգման փորձով՝ ներկայացնելով մասնակիցներին OTTERS և STREAKS նախագծերի հաջողված հայտադիմումների ներկայացման և համակարգման գործնական օրինակներ։
Միջոցառումը, որին ներկա էին Հայաստանի տարբեր կազմակերպությունների շուրջ 40 ներկայացուցիչ, դրական արձագանքներ ստացավ մասնակիցների կողմից:
